母乳餵哺的第9個月

妍妍已9個月大, 也是我成功母乳餵哺9個月了!

由妍妍轉固體食物開始，乳腺都塞過幾次了。

 

第一次在新年前後，因為有時出了街，時間亂了，我又谷奶，未能即時擠出或埋身餵，以至有硬塊出現，感到痛楚，狂推也擠不出，擔心會惡化去睇醫生。

 

3月底，最近減少了PUMP奶的次數，但早上起來未餵哺的一邊又非常谷，當我11點去PUMP奶時，已經好硬。又有時奶奶好晏先餵妍妍食粥，我放工回家妍妍還未肚餓，在好谷的情況下餵少了一次。又因去探朋友，預算不到時間又無理會，加加埋埋就出事了。今次更痛，也令奶量少左好多。除了睇醫生，也致電母乳熱線姑娘，她教我敷冰敷椰菜，睡前也敷冰，讓第二朝起床時唔好谷奶。

姑娘也叫我翌日返健康院，健康院姑娘教我食完的一邊就不要PUMP奶了，只PUMP未食的一邊。谷奶的一邊每次先食，然後可食埋另一邊(原來BB大了，不用跟初生的一套-每餐食一邊同PUMP完左邊PUMP右邊來回2次)。平時都係敷冰唔好谷奶，谷奶就讓BB埋身食，最幫到我都是BB埋身食。經過幾天後，確實通番好多，乳房鬆了，但感到BB好用力才食到，可能奶量少了(未出事前是最多奶的一邊 :/ )。不知會唔會可以回復以前的呢？只怪自己不好好去處理啦！日後真係要小心小心。免得谷奶令乳腺又塞呀！早幾天飲了木瓜湯，唔知係咪乳腺未好返，又痛番呀 >.<

 

這9個月餵哺母乳的日子，回頭想真的不易過，由初時每天餵哺十多次至今每天餵哺四至五次，每次花上我很多的時間及痛楚，但是值得的，換來的是囡囡的健康嘛！這是媽媽能夠從我自己身上所送給妳的禮物呀，感覺也是我一生中最大的成就。