渣打信用咭迎新換購禮物 ($299包2人來回TURBOJET及住宿皇都酒店一晚)
DAY 1 - - - 26/2/12(日)
早上放低妍妍在奶奶度，然後我地搭914去信德中心。在澳門茶餐廳食個靚早餐後就入閘喇，我地搭11AM船去澳門。今次係我地有左妍妍後，第一次2人世界呀，確在好難得，都好掛住妍妍架，不過一晚半晚:P。今次都係佢第一次在奶奶度過夜呀，唔知會點呢？
未到12PM就到達碼頭，我地先搭威尼斯人SHUTTLE BUS 去行下同埋PUMP MILK呀。之後搭的士($36)去路環的「里斯本地帶餐廳」，叫左蒜蓉炒蜆($96)、炸馬介休球($75)、肉眼扒($160)，全部都好味道，埋單$360。呢餐係全程最貴既一餐喇..嘻嘻。之後在附近行下，就去安德烈葡撻總店呀，每人叫了一個($8/EACH)，好味道，一D都唔滯呀！然後我地搭巴士25號去氹仔官也街(在銀河站下車過對面馬路就係)。先周圍逛逛，然後去興記食豬扒包、飲熱奶茶、熱好立克(TOTAL$34)，都OK啦。本來想去莫義記食大菜糕，但見佢要$15/杯就無食，駛唔駛咁貴呀，唔值。行行下見到有棉花糖($2超抵)，好懷念童年時在街市有個阿叔賣呢D一支支既棉花糖呀，而家真係好少見，即刻去買來食啦。然後去地堡街行，幫阿媽去日興堂買米果，味道還可以，不過唔係好脆，算係新口味手信啦。去沙度娜買左個榴槤木糠布甸($11)兩份食，好味道。跟住我地就去番頭先個站搭25號巴士返皇都，本來在水坑尾街落車，但因為有遊行，司機SKIP左個站，要行遠左路返酒店。間酒店其實都OK架，係有少少偏僻，但著名景點都在附近，步行就可以了。房間好乾淨同新淨呀，都好滿意呀。回到房間，又要PUMP MILK，PUMP完又再出發，步行去議士亭前地，途經荷蘭園去左禮記雪糕，點了芋頭味雪糕($9)好正呀，仲有懷舊既三文治雪糕($11)。由葡京那邊再行過去，不過D路唔同哂呀，都唔係好識行，最後當然到達目的地啦。老公話肚餓，我地先去食翅，原本計劃食譚記，但係見到添發(福隆街)好多人，老公話想試下，叫左一個花膠海參煲翅($85)同豪華碗仔翅($40)，好味道，再直行找到想食既三元粥，叫左魚片肉丸粥同魚片牛肉粥，真係好鮮味同足料呀，一D都唔貴，每碗$24。再食埋祥記蝦籽面($24)及雲吞面($20)。第一次食蝦籽面，都幾好味呀，D面係竹昇面，真係好味D喎，無梘水味。食完呢餐就真係飽喇，再步行去MGM行下，然後返酒店休息喇。
DAY 2 - - -27/2/12(一)
早上7點半起床，梳洗及PUMP MILK，然後去食早餐，本來想去永安咖啡室食，點知星期一休息，就去了附近一間叫渼味軒食，係帶有少少緬甸菜式架，我地叫左一個緬甸椰汁雞翼面(較清淡)及緬甸咖哩雞翼面(較濃味，不過好味)，加杯飲品，$26/餐。食完就去附近的松山公園行，本來想搭纜車，原來星期一休息架，唯有下次帶埋妍妍來才搭啦。呢個公園好大呀，都好多野睇，好舒服。我地上左燈塔，來咁多次澳門，都係第一次上來咋。仲有好多休閒設施，值得行下，離開澳門呢個人多車多既地方，上來吸收下清新空氣。行完就返酒店PUMP MILK同執行李CHECK OUT喇。再步行去大三巴及大炮台，來到呢邊，雖然係星期一，但依然係好多人呀。我地中午呢餐選擇掃街，買左炭燒胡椒餅($14)、煎釀茄子同青椒($10/8件，好好味)、潘榮記炭燒金錢餅($20)，食完呢D都飽左7成喇。仲有邊行邊試食杏仁餅、肉乾。食飽就去買手信喇，鉅記同埋葡京既腰果曲奇。來到最後一站就係去MGM食HIGH TEA，可以HEA下，途中都去左瑪加烈買左個葡撻食，不過都係安記好味好多呀。去到MGM，我同老公每人叫了一個SET($88包三文治、全選一件CAKE加$40以下飲品)，叫了德國黑椒牛肉麥包三文治同吞拿魚三文治，真係意外驚喜，好味道呀。仲伴左D自家製薯片，俾你一邊飲野一邊食，食完包我就PUMP MILK，之後食埋件CAKE，我叫左我至愛既CHOCOLATE CAKE，老公叫了蘋果朱古力甜餅，單售都係42/件，所以呢個SET好抵架。食完就搭番MGM既SHUTTLE 去碼頭，呢個旅程終於結束，返去繼續湊女喇，哈哈！
(小插曲：欲離開時，一站起身，件褸”HIGH”跌隻杯，爛左添@.@)
總結：
今次2個人去真係好開心呀，可以食到好多地道美食，所有都係我之前未食過架。澳門美食真係好味道，下次要再去食過呀！當然帶埋我地個寶貝女啦!
沒有留言:
張貼留言